நபிகளாரை உக்காஷா பழி தீர்த்தாரா ?

எமது முஸ்லிம் சமூகத்தில் புளக்கதில் உள்ள தவறாக விளங்கப்பட்ட அல்குர் ஆன் வசனங்கள்,ஆதாரபூர்வமான செய்திகள்,மற்றும் ஆதாரபூவமான முறையில் அறிவிக்கப்படாத ஹதீஸ்கள், பதிவு செய்யப்படாத வரலாற்று சம்பவங்கள் என்பதை நாம் அறிந்து அவைகளை எமது பேச்சுகளிலும் எழுத்துகளிலும், கருத்துப் பரிமாற்றங்களிலும் தவிர்க்க வேண்டும் என்ற நோக்கத்திற்காக இத்தொடர் ஆரம்பிக்கப்பட்டுள்ளது.

இதில் முதலாவதாக உமர் (ரழி) அவர்கள் மஹர் தொகைய வரையறை செய்ய முற்பட்ட வேளையில் ஒரு பெண் எழுந்து ஆட்சேபித்த செய்தி ஆதாரபூவமானதல்ல என்பதை நேக்கினோம்.

இத்தொடரிலும் அவ்வாறே மிகவும் பிரபல்யமான மக்கள் மத்தியில் புழக்கத்தில் உள்ள நபி (ஸல்) அவர்களுடன் தொடர்புடைய ஒரு சம்பவத்தை நோக்கவுள்ளோம்.

சம்பவம் இதுதான்:

"அல்லாஹ்வின் உதவியும் வெற்றியும் வந்தால், மக்கள் கூட்டங்கூட்டமாக அல்லாஹ்வின் மார்க்கத்தில் நுழைவதைப் பார்த்தால்................." எனும் சூறா அந்நஸ்ர் இறங்கிய போது நபி (ஸல்) அவர்கள் ஜிப்ரீலே "எனது மரணச்செய்தி அறிவிக்கப்பட்டு விட்டது" எனக் கூறினார்கள் அதற்கு ஜிப்ரீல் "மறுமை இம்மையை விட உங்களுக்கு சிறந்தது, உமது இரட்சகன் உமக்கு அருட்கொடைகளைக் கொடுப்பான் நீர் அதனைப் பொருந்திக் கொள்வீர்" என்றார்கள்.

பின்பு நபியவர்கள் பிலால் (ரழி) அவர்களை "தொழுகைக்காக தயாராகுங்கள்" என அழைப்பு விடுக்குமாறு கட்டளையிட்டார்கள். முஹாஜிர்கள் அன்ஸார்கள் மஸ்ஜிதுன் நபவியிலே ஒன்று திரண்டார்கள்.பிறகு நபி (ஸல்) அவர்கள் மிம்பரிலே ஏறி அல்லாஹ்வைப் புகழ்ந்து உள்ளங்கள் நடுங்க வைக்கும் கண்களைக் கலங்க வைக்கும் ஒரு உரையை நிகழ்த்தினார்கள்.

நான் எப்படியான நபியாக உங்கள் மத்தியில் இருந்தேன் என நபியவர்கள் கேட்ட கேட்ட போது மக்கள் சிறந்த நபியாக இருந்தீர்கள்......" என சிலாகித்துக் கூறினார்கள்.
பின்பு நபியவர்கள் "உங்களில் யாருக்காவது ஏதாவது அநியாயம் நான் செய்திருந்தால் அதற்காக நீங்கள் உலகிலேயே பழிதீர்த்துக் கொள்ளுங்கள் என தோழர்களிடம் வேண்டினார்கள்.

தோழர்களில் யாரும் எதுவும் சொல்லவில்லை,ஆனால் பின்னால் இருந்து உக்காஷா என்ற ஒரு முதியவர் மக்களைக் கடந்து நபி (ஸல்) அவர்களுக்கு முன்னால் வந்து நின்று "நபியவர்களே!! நான் உங்களுடன் ஒரு யுத்தத்திற்கு வந்து திரும்பும் வழியில் எனது ஒட்டகமும் உங்கள் ஒட்டகமும் அருகருகே வந்த போது நான் உங்கள் தொடையை முத்தமிட முயற்சித்தேன். அப்போது நீங்கள் கம்பால் என்னை அடித்தீர்கள். நீங்கள் என்னைத்தான் அடிக்க வேண்டும் என்று அடித்தீர்களா அல்லது ஒட்டகத்தை அடிக்கும் போது எனக்குப் பட்டதா எனத் தெரியவில்லை." எனக் கூறினார்.

அதற்கு நபியவர்களோ நான் உன்னை வேண்டுமென்றே அடிக்கவில்லை எனக் கூறிவிட்டு "பிலாலே பாத்திமாவின் வீட்டுக் சென்று அந்தக் கம்பைக் கொண்டுவாருங்கள்" என்றார்கள்.

"நபியவர்கள் தன்னைப் பழிவாங்கும் படி கூறிவிட்டார்கள்" என சத்தமிட்டவாறே பிலால் (ரழி) அவர்கள் பாத்திமா (ரழி) அவர்கள் வீட்டுக்குச் சென்று கதவைத் தட்டி கம்பைத் தரும் படி கேட்டார்கள். "கம்பை வைத்து எனது தந்தை என்ன செய்யப் போகிறார்கள்? இது ஹஜ் காலமோ யுத்த காலமோ அல்லவே? என பாத்திமா (ரழி) அவர்கள் கேட்க "நபியவர்கள் உலகை விட்டு விடை பெறப்போகிறார்கள், அதனால் தான் அநியாயாம் இழைத்திருந்தால் பழிதீர்க்கச் சொல்லிவிட்டார்கள்" என பிலால்(ரழி) அவர்கள் விடையளித்தார்கள்.

அதற்கு பாத்திமா (ரழி) அவர்களோ "நபி (ஸல்) அவர்களிடம் பழி தீர்க்க யாருக்குத்தான் மனம் இடங்கொடுக்குமோ" எனக் கூறி ஹஸன் , மற்றும் ஹுஸைன் (ரழி) அவர்களிடம் நபியவர்களுக்கு பகரமாக பழிதீர்க்க இடமளிக்கும் படி சொல்லுங்கள்" என பிலால் (ரழி) அவர்களிடம் வேண்டிக் கொண்டு கம்பைக் கொடுத்தனுப்பினார்கள்.

பிலால் (ரழி)அவர்கள் மஸ்ஜிதுன் நபவிக்கு கம்பைக் கொண்டு வந்ததும் நபியவர்கள் அதை உக்காஷா (ரழி) அவர்களிடம் கொடுத்து தன்னைப் பழிதீர்க்கும் படி பணித்தார்கள். அப்போது அபூ பக்கர் (ரழி) அவர்களும் உமர்(ர்ழி) அவர்களும் எழுந்து நபியவர்களுக்குப் பதிலாக தங்களை பழிதீர்க்க வேண்டினார்கள். நபி (ஸல்) அவர்களோ அதை தடுத்து விட்டார்கள்.

பின்பு அலி (ரழி) அவர்கள் எழுந்து நபி (ஸல்) அவர்களைப் பழி தீர்ப்பதற்கு பதிலாக தன்னை நூறு அடி அடித்துக் கொள்ளுங்கள் என உக்காஷா (ரழி) அவர்களிடம் வேண்டினார்கள். அதையும் நபியவர்கள் தடுத்து தன்னையே பழி தீர்க்க அடித்துக் கொள்ளும்படி உக்காஷா (ரழி) அவர்களை வேண்டினார்கள்.

அதற்கு உக்காஷா (ரழி) அவர்களோ "நீங்கள் என்னை அடித்த போது நான் ஆடையில்லாமல் வற்றைக் காட்டிய நிலையில் இருந்தேன். எனக் கூறிய போது நபி (ஸல்) அவர்களும் தனது ஆடையை விலக்கி வயிற்றைக் காட்டினார்கள்.

நபியவர்களின் வயிற்றின் வெண்மையைக் கண்ட உக்காஷா (ரழி) அவர்கள் தன்னைக் கட்டுப்படுத்திக் கொள்ள முடியாமல் உடனே பாய்ந்து நபியவர்களின் வயிற்றை முத்தமிட்டு "எனது தாயும் தந்தையும் உங்களுக்கு அர்ப்பணமாகுக! யாராவது உங்களிடம் பழிதீர்ப்பார்களா? என்று கூறினார்கள்.

அப்போது நபியவர்கள் "இல்லை நீங்கள் பழிதீர்க்க வேண்டும் அல்லது என்னை மண்ணித்து விட வேண்டும் எனக் கூறவே உக்காஷா (ரழி) அவர்கள் "மறுமையில் என்னை அல்லாஹ் மண்ணிப்பான் என்பதால் நான் உங்களை மண்ணிக்கிறேன்" என்றார்கள்.
அப்போது நபி (ஸல்) அவர்கள் சுவனத்தில் எனது தோழரைப் பார்க்க வேண்டும் என்றால் உக்காஷாவைப் பார்த்துக் கொள்ளுங்கள்" எனக் கூறினார்கள்.

உடனே முஸ்லிம்கள் உக்காஷா (ரழி) அவர்களை முத்தமிட்டு சுவனம் அவருக்கு வாக்களிக்கப்பட்டதையிட்டு சோபனம் கூறினர்.
நபியவர்கள் அன்றைய தினமே நோய்வாய்ப்பட்டு பதினெட்டு நாட்களாக நோயாளியாக இருந்து மரணித்து இறையடி எய்தினார்கள்."

அறபியில் வெகு சில நூற்களில் பதியப்பட்டிருக்கும் இச் செய்தியை தமிழ் பேசும் முஸ்லிம்கள் மத்தியில் பட்டி தொட்டியெல்லாம் ஒரு நாள் மதினா நகர்தனிலே..... ஓங்கிடும் மஸ்ஜிது நபவியிலே.... என தனது கம்பீரக் குரலால்!! கொண்டுபோய்ச் சேர்த்த பெருமை!! ஈ எம் நாகூர் ஹனீபா அவர்களையே சாரும்!!.

இனி இச்செய்தியின் உன்மை நிலையை உற்று நோக்குவோம்.

குறித்த இச்சம்பவம் இமாம் தபறானி அவர்களது "முஃஜமுல் கபீர்" என்ற நூலிலும் இமாம் அபூ நுஐம் அல் அஸ்பஹானி அவர்களது ஹில்யதுல் அவ்லியா என்ற நூலிலும் இமாம் இப்னுல் ஜௌஸி அவர்களது மௌலூஆத் (இட்டுக் கட்டப்பட்ட செய்திகள்) என்ற நூலிலும் இடம் பெற்றுள்ளது.!!

இதன் அறிவிப்பாளர் வரிசையில் இடம் பெறும் அப்துல் முன்இம் பின் இத்ரீஸ் பின் ஸினான் என்பவர் பெரும் பொய்யர் என ஹதீஸ் கலை அறிஞர்கள் பலராலும் குற்றஞ்சாட்டப்பட்டவர். தனது தந்தையின் பெயரிலும் ஏனைய நம்பகமாக ஹதீஸ் அறிவிப்பாளர்களின் பெயரிலும் ஹதீஸ்களை இட்டுக் கட்டுபவர் எனவும் அறியப்படுகிறார்.

எனவே இத்தகைய பொய்யன் நபி (ஸல்) அவர்களோடு தொடர்பு படுத்தி அறிவிக்கும் செய்தியை நாம் எந்தவகையில் ஏற்றுக் கொள்ளக் கூடாது. சமூகத்தில் பரப்ப அனுமதிக்கக் கூடாது.

அவுலியாக்களின் அற்புதங்கள்

உயிருடன் இருப்பது மட்டும் பிரார்த்தனை செய்வதற்குரிய தகுதியாகுமா?

ஒருவர் உயிரோடு இருக்கிறார் என்பதற்காக அவரிடம் போய்ப் பிள்ளையைக் கேட்க முடியுமா? மழையைக் கேட்க முடியுமா? உயிரோடு இருப்பதால் பிரார்த்திக்கின்றோம் என்றால் பிரார்த்திப்பவர்களும் உயிருடன் தானே உள்ளனர்?

ஈஸா நபி உண்மையாகவே உயிருடன் உள்ளார். மலக்குகள் உயிருடன் உள்ளனர். ஈஸா நபியைப் பிரார்த்திப்பவர்களைக் காஃபிர்கள் எனக் கூறுவோர் தங்கள் செயலை எப்படி நியாயப்படுத்த முடியும்?

அவ்லியாக்களின் அற்புதங்கள்!

நபிமார்கள் அற்புதங்கள் நிகழ்த்தியதாக ஏராளமான சான்றுகள் திருக்குர்ஆனிலும், ஹதீஸ்களிலும் உள்ளன. இவற்றை ஆதாரமாகக் கொண்டு ‘மகான்கள் அற்புதங்கள் நிகழ்த்துவார்கள்; எனவே அவர்களிடம் நமது தேவைகளைக் கேட்கலாம்; பிரார்த்திக்கலாம்’ என்று சிலர் வாதிடுகின்றனர்.

அற்புதங்கள் பற்றி அவர்களுக்கு முழுமையான விளக்கமில்லாத காரணத்தால் தான் இத்தகைய வாதத்தை முன் வைக்கின்றனர்.

‘அவ்லியாக்கள் அற்புதங்கள் நிகழ்த்துவார்கள்’ என்ற இந்த நம்பிக்கை தான் தர்கா வழிபாட்டுக்கு அடித்தளமாக அமைந்துள்ளது.

அற்புதங்கள் அல்லாஹ்வின் கையில்

நபிமார்கள் பல்வேறு சந்தர்ப்பங்களில் அற்புதங்கள் நிகழ்த்தியதாக திருக்குர்ஆன் கூறுகிறது. எனவே அதை மறுப்பவர் குர்ஆனை மறுத்தவராவார்.

ஆனால் நபிமார்கள் எப்போது அற்புதம் நிகழ்த்திக் காட்ட விரும்புகிறார்களோ, அல்லது அவர்களிடமிருந்து மக்கள் எப்போது அற்புதத்தை எதிர்பார்க்கிறார்களோ அப்போதெல்லாம் நபிமார்கள் அற்புதங்களை நிகழ்த்த முடியாது. அல்லாஹ் எப்போது அனுமதி அளித்துள்ளானோ அந்த நேரத்தில் மட்டும் தான் அவர்களால் அற்புதங்கள் நிகழ்த்த முடியும். அற்புதங்கள் நிகழ்த்தும் அதிகாரம் அல்லாஹ்வின் கையிலேயே உள்ளது.

உமக்கு முன் தூதர்களை அனுப்பினோம். அவர்களுக்கு மனைவியரையும், மக்களையும் ஏற்படுத்தினோம். எந்த ஒரு தூதரும் அல்லாஹ்வின் விருப்பமின்றி எந்த அற்புதத்தையும் கொண்டு வர முடியாது. ஒவ்வொரு தவணையும் பதிவு செய்யப்பட்டுள்ளது.

அல்குர்ஆன் 13:38

உமக்கு முன் பல தூதர்களை அனுப்பினோம். அவர்களில் சிலரைப் பற்றி உமக்குக் கூறியிருக்கிறோம். அவர்களில் சிலரைப் பற்றி நாம் உமக்குக் கூறவில்லை. அல்லாஹ்வின் விருப்பப்படியே தவிர எந்த அற்புதத்தையும் கொண்டு வருவது எந்தத் தூதருக்கும் இல்லை. எனவே அல்லாஹ்வின் கட்டளை வரும் போது நியாயமாகத் தீர்ப்பளிக்கப்படும். அப்போது வீணர்கள் நஷ்டமடைவார்கள்.

(அல்குர்ஆன் 40:78)

‘நாங்கள் உங்களைப் போன்ற மனிதர்கள் தாம். ஆயினும் தனது அடியார்களில் தான் நாடியவர் மீது அல்லாஹ் அருள் புரிகிறான். அல்லாஹ்வின் விருப்பமின்றி எந்த அற்புதத்தையும் உங்களிடம் எங்களால் கொண்டு வர இயலாது. நம்பிக்கை கொண்டோர் அல்லாஹ்வையே சார்ந்திருக்க வேண்டும்’ என்று அவர்களின் தூதர்கள் கூறினர்.

(அல்குர்ஆன் 14:11)

அல்லாஹ்வின் அனுமதியில்லாமல் நபிமார்கள் எந்த ஒரு அற்புதத்தையும் நிகழ்த்த முடியாது என்பதற்கு மறுக்க முடியாத ஆதாரமாக இவ்வசனங்கள் அமைந்துள்ளன.

‘இப்பூமியில் நீரூற்றை எங்களுக்காக நீர் ஓடச் செய்யாத வரை உம்மை நாங்கள் நம்பவே மாட்டோம்’ என்று கூறுகின்றனர். அல்லது உமக்கு பேரீச்சை மற்றும் திராட்சைத் தோட்டம் இருக்க வேண்டும். அவற்றுக்கு இடையே நதிகளை நீர் பெருக்கெடுத்து ஓடச் செய்ய வேண்டும். அல்லது நீர் நினைப்பது போல் வானத்தைத் துண்டு துண்டாக எங்கள் மீது விழச் செய்ய வேண்டும். அல்லது அல்லாஹ்வையும், வானவர்களையும் நேரில் நீர் கொண்டு வர வேண்டும். அல்லது தங்கத்தால் உமக்கு ஒரு வீடு இருக்க வேண்டும். அல்லது வானத்தில் நீர் ஏற வேண்டும். நாங்கள் வாசிக்கும் விதமாக எங்களிடம் ஒரு புத்தகத்துடன் இறங்கினால் தவிர நீர் ஏறிச் சென்றதை நம்ப மாட்டோம் (எனவும் கூறுகின்றனர்) ‘என் இறைவன் தூயவன். நான் மனிதனாகவும், தூதராகவுமே இருக்கிறேன்’ என்று (முஹம்மதே!) கூறுவீராக!

(அல்குர்ஆன் 17:90-93)

மேற்கண்ட அற்புதங்களை நிகழ்த்திக் காட்டுவது அல்லாஹ்வுக்கு மிகவும் எளிதானது தான். இவை அனைத்தையும் செய்து காட்டுமாறு அவர்கள் கோரிக்கை வைக்கவில்லை. இவற்றில் ஏதேனும் ஒன்றைத் தான் கோரினார்கள். அவ்வாறு செய்து காட்டினால் நபிகள் நாயகத்தை நம்புவதாகவும் கூறினார்கள்.

மனிதன் என்றும் இறைவனின் தூதர் என்றும் வாதிடும் என்னிடம் இறைவனிடம் கேட்பதை எப்படிக் கேட்க முடியும்? என்ற கருத்து நபிகள் நாயகம் (ஸல்) அவர்கள் அளித்த பதிலில் அடங்கியுள்ளது.

அற்புதங்களை நிகழ்த்துபவன் அல்லாஹ் தான். அவன் நாடும் போது மனிதர்கள் மூலம் வெளிப்படுத்துகிறான் என்பதைப் புரிந்து கொள்ள இந்த ஆதாரங்கள் போதுமானவையாகும்.

அற்புதங்களைச் செய்பவன் அல்லாஹ் மட்டுமே என்பதைப் புரிந்து கொள்ள மற்றொரு கோணத்திலும் நாம் சிந்திக்க வேண்டும்.

கனவுகள் இறைவனின் கட்டளையாகுமா?

அல்லாஹ்விடம் மட்டும் தான் உதவி தேட வேண்டும் என்பதை
ஏற்காதவர்கள் தங்கள் தரப்பில் மற்றொரு வாதத்தையும் முன் வைக்கின்றனர்.

அல்லாஹ்வைத் தவிர யாரிடமும் பிரார்த்திக்கக் கூடாது என்றால் மகான்கள் எங்கள் கனவில் வந்து தர்காவுக்கு வருமாறு அழைப்பு விடுக்கிறார்களே! மார்க்கத்தில் தடை செய்யப்பட்ட ஒரு காரியத்துக்கு மகான்கள் அழைப்பார்களா? என இவர்கள் கேட்கின்றனர்.

கனவுகள் பற்றி இவர்கள் சரியான முறையில் அறியாததே இந்த வாதத்துக்குக் காரணம்.

‘யார் கனவில் என்னைக் காண்கிறாரோ அவர் என்னையே கண்டார். ஏனெனில் ஷைத்தான் என் வடிவில் வர மாட்டான்’ என்று நபிகள் நாயகம் (ஸல்) கூறினார்கள்.

அறிவிப்பவர்: அபூ ஹுரைரா (ரலி)

நூல்: புகாரி 110, 6197,

நபிகள் நாயகம் (ஸல்) அவர்களின் வடிவத்தில் தவிர மற்ற எவருடைய வடிவத்திலும் எவருடைய பெயரைக் கூறிக் கொண்டும் ஷைத்தான் கனவில் வருவான் என்பது இந்த ஹதீஸின் கருத்தாகும்.

கனவில் வரக்கூடியவர் ‘நான் தான் அப்துல் காதிர் ஜிலானி’ என்று கூறுவதால் அவர் அப்துல் காதிர் ஜிலானியாக மாட்டார். ஷைத்தானே கனவில் வந்து ‘நான் தான் அப்துல் காதிர் ஜிலானி’ எனக் கூறலாம்.

மார்க்கத்தில் தடை செய்யப்பட்ட ஒரு செயலுக்கு – தர்காவில் பிரார்த்தனை செய்யும் செயலுக்கு – அழைப்பு விடுப்பதிலிருந்து வந்தவன் ஷைத்தான் தான் என்பது உறுதியாகின்றது.

கனவில் ஒருவரை நாம் பார்த்து அடையாளம் காண்பது என்றால் அவரை நேரடியாக நாம் பார்த்திருக்க வேண்டும். நாம் நேரில் சந்தித்திராத ஒருவரை கனவில் பார்த்து இன்னார் என்று கண்டு பிடிக்க முடியாது.

கனவில் அப்துல் காதிர் ஜிலானியைப் பார்த்ததாகக் கூறுவோர் அவர் காலத்தில் வாழவில்லை. அவரை நேரடியாகப் பார்த்ததுமில்லை. பிறகு எப்படி இவர் தான் அப்துல் காதிர் ஜிலானி என்று கண்டு பிடித்தார்கள்?

கனவில் ஒருவர் வருகிறார் என்றால் அவரே வருகிறார் என்று பொருள் இல்லை. உதாரணமாக என்னை நீங்கள் கனவில் காண்கிறீர்கள். நீங்கள் என்னைக் கனவில் காண்கிறீர்கள் என்று எனக்குத் தெரியாது. நான் நேற்றிரவு உங்கள் கனவில் வந்தேனே என்று என்னால் உங்களிடம் கூற முடியாது. கனவில் என்னை யாராவது கண்டாலும் நான் எதையாவது கூறுவதாகக் கண்டாலும் அதற்கும், எனக்கும் எந்தச் சம்மந்தமும் இல்லை.

ஒரு மகானையே கனவில் கண்டால் கூட அந்த மகானுக்கு இன்னார் கனவில் நாம் வருகிறோம் என்பது தெரியாது. நல்ல நோக்கத்திற்காகவும், சோதித்துப் பார்ப்பதற்காகவும் கனவுகளில் பலவிதமான காட்சிகளை அல்லாஹ் காட்டுவான்.

நபிகள் நாயகம் (ஸல்) அவர்களுடைய மார்க்கம் முழுமைப்படுத்தப்பட்டு விட்டதால் மார்க்க சம்மந்தமான எந்த உத்தரவும் கனவில் வராது. மார்க்கத்தின் கட்டளைகளுக்கு எதிரான எந்த உத்தரவும் அல்லாஹ்விடமிருந்து கனவில் வராது.

எனவே ஒரு மகானையே கனவில் கண்டாலும் அவர் என்ன கூறினாலும் அவர் மகானுமல்ல, அவர் கூறுவது மார்க்கமும் அல்ல என்பதைப் புரிந்து கொள்ள வேண்டும்.

கிணற்றில் விழுந்து தற்கொலை செய்து கொள்வதைப் போல் கனவு கண்டால் காலையில் எழுந்தவுடன் கிணற்றில் விழுந்து சாக மாட்டோம். பெரும் தொகையை ஒருவருக்கு கொடுப்பதைப் போல் நாம் கனவு கண்டால் விழித்தவுடன் அத்தொகையை அவரிடம் கொடுத்து விட மாட்டோம்.

உலக விஷயங்களில் மட்டும் மிகவும் விழிப்போடு தான் இருக்கிறோம். கனவில் கண்டதையெல்லாம் செய்ய முடியுமா என்று கேள்வி கேட்டு கனவில் காண்பதை நடைமுறைப்படுத்தாமல் தவிர்த்து வருகிறோம்.

ஆனால் மார்க்க விஷயத்தில் தான் கனவைக் காரணம் காட்டி நாசமாகிறோம்.

நபிமார்களின் கனவுகள் தான் முழுக்க முழுக்க வஹீயாகும். இதன் காரணமாகத் தான் மகனை அறுப்பதாகக் கனவு கண்ட இப்ராஹீம் நபி அவர்கள் அதை நடைமுறைப்படுத்தத் தயாரானார்கள். மற்ற எவரது கனவும் நடைமுறைப்படுத்த வேண்டியவை அல்ல.

நமக்கு எதிர்காலத்தில் நடக்கக் கூடிய சில பயன்களை முன்கூட்டியே சில நேரத்தில் கனவு மூலம் அறிவிக்கப்படலாம். ஆனால் மார்க்கக் கட்டளைகள் ஒன்று கூட கனவில் வராது. இதைப் புரிந்து கொள்ள பின்வரும் நபிமொழி உதவுகிறது.

நற்செய்தி கூறக்கூடியவை தவிர, வஹியில் எதுவும் மிச்சமாக இருக்கவில்லை என்று நபிகள் நாயகம் (ஸல்) கூறினார்கள். நற்செய்தி கூறக்கூடியவை என்றால் என்ன என்று நபித்தோழர்கள் கேட்டனர். அதற்கு நபிகள் நாயகம் (ஸல்) அவர்கள் நல்ல கனவுகள் என விடையளித்தார்கள்.

அறிவிப்பவர்: அபூ ஹுரைரா (ரலி)

நூல்: புகாரி 6990,

நற்செய்திகள் தான் கனவில் வர முடியுமே தவிர மார்க்கத்தின் எந்தச் சட்டமும் கனவில் வராது.